5月 26 2017
爽身粉都致癌?──滑石粉出沒注意 | Dr. Koala
相信有留意開新聞嘅朋友都知道，早前美國一名婦人因長期（超過35年）使用強生（Johnson and Johnson）爽身粉去爽佢私處，去年死於卵巢癌，陪審團裁定強生須賠償7,200萬美元（5.6億港元）。呢單野引起全世界哄動（起碼美國同香港係，非洲個頭不詳），原來致癌嘅係爽身粉入面嘅滑石粉(talc)，呢種滑石粉嘅應用非常廣泛，由建築工業、食品、藥品，甚至化妝品同嬰兒產品都有。
滑石粉可致癌？
「滑石粉」係天然礦石，由鎂(magnesium)、硅(silicon)同氧(oxygen)組成，佢同含有石棉成分嘅蛇紋岩一齊藏係地底，因此未經過濾嘅滑石粉通常含有石棉(Asbestos)成分，而佢亦係為人所共知嘅致癌物。
未經過濾嘅滑石粉係相當危險嘅成分，因為其中極微小嘅石棉纖維會飛散到空中，長時間吸入肺部，會誘發肺塵病、肺癌等疾病。
如果將有滑石粉嘅產品用係私處，粉末經由陰道、子宮、輸卵管進入卵巢表面，刺激卵巢的上皮細胞過度增，低程度但長時間的發炎可能足以產生癌症。2013年《Journal Cancer Prevention Research》研究指出經常於生殖器官部位使用滑石粉會增加整體上皮卵巢癌風險20-30%。
經過濾嘅滑石粉就安全?
現時歐盟要求所有嬰兒用品及化粧品都必須使用經過過濾嘅滑石粉，以免混雜有石棉，但醫學界一直質疑，即使濾走石棉仍有健康風險，所有為左健康著想，計我話都係盡量少用含滑石粉嘅產品，尤其用係臉上同女性私處。
化妝品的應用
由於滑石粉含有大量硅元素(Silicon)，具有阻隔紅外線嘅能力，因此有啲化妝品廠商會加入滑石粉，以增強化妝品嘅防曬同抗紅外綫性能。滑石粉更可以令化妝品有更幼滑嘅質感，令皮膚摸落去滑啲。
發生呢單野之後，有記者查探過香港各大美容店，發現唔少化妝品都有含有talc（滑石粉），好多粉狀化妝品包括眼影、碎粉或其他礦物化妝品都有用到，由於化妝品搽係臉上面，好容易會吸入肺部，因而增加患肺癌風險(食煙就話會生肺癌姐，如果連化妝都會真係無陰公…)一次半次當然冇所謂，但化妝係女人一生嘅大業，日日都要用到嘅就梗係唔好貪平亂買啦，唯有仔細留意每一種成份先係王道！
![[Dr. Koala 成分小學堂] 果酸(AHA) - 四大換膚功效](http://www.drkoalahk.com/cdn/shop/articles/25_large.jpg?v=1658243989)
![[Dr. Koala 成分介紹] 柳樹皮 - 天然暗瘡剋星](http://www.drkoalahk.com/cdn/shop/articles/Dr._Koala_large.jpg?v=1658294632)
![[Dr. Koala 產品分析] Juice Organics 有機椰子修護洗髮乳](http://www.drkoalahk.com/cdn/shop/articles/Dr._Koala_Juice_Organics_large.jpg?v=1658244128)
