抗衰老大作戰(一)──認識最大敵人

在 三月 03 2017發佈

抗衰老大作戰(一)──認識最大敵人

 

對各位女生黎講,肌膚要面對最可怕嘅問題莫過於衰老,唔好以為呢啲野等老左先理,到你三四十歲果陣,就會後悔點解當初冇好好保養皮膚㗎啦!

 

我仲係十零廿歲,抗衰老離我好遠?

其實踏入二十歲,皮膚已經開始容易缺水乾燥、毛孔突然變大、皮膚有細紋、膚色黯淡冇光澤。

眉間、額頭、眼尾和眼下出現細紋,以及上妝後粉底易卡係法令紋,呢啲都係開始老化嘅現象。所以要對抗衰老,真係要趁後生好好保養好皮膚,未雨綢繆,每日做好潔面爽膚保濕,隔幾日敷一次mask,有化妝嘅更加要每次做好卸妝,呢啲只係最基本,勤力嘅,最好就配合埋適合嘅抗衰老護膚品。

抗衰老大作戰(一)──認識最大敵人 | Dr. Koala

青春最大敵人--紫外光(UV light)!

要進行抗衰老作戰,首先要知道邊個係你嘅最大敵人,佢就係紫外光(UV light) 啦,9成皮膚衰老問題都係由佢引致㗎。紫外光可根據波長(wavelength)分為UVA, UVB, UVC三種。

 

  • UVC (波長100-290nm)

最唔影響皮膚嘅UV light band,雖然直接殺傷力最強,但因為絕大部分俾臭氧層吸收咗,去唔到我地嘅皮膚就自然無影響啦。多數只會係啲人工來源如水銀弧光燈同殺菌燈度搵到。

 

  • UVB (波長290nm-320nm)

對皮膚嘅直接破壞性好高,係曬傷同皮膚癌嘅主要元兇,亦會直接破壞皮膚嘅膠原蛋白(collagen)及維他命A(vitamin A)加速皮膚老化。好彩嘅係佢唔會穿透到玻璃,所以係室內就唔怕佢。

 

  • UVA(波長320nm-400nm)

因為直接破壞性唔強,以前一直被認為對皮膚無咩大影響,不過近年開始發現佢嘅間接破壞性,分分鐘仲勁過UVB嘅直接攻勢!

點解?簡單嚟講,UVA有更強嘅皮膚穿透力,可以直入皮膚深層,產生出自由基(例如羥基hydroxyl radical)及Reactive Oxygen Species(ROS, 例如singlet oxygen),佢地活性極強,會破壞膠原蛋白(collagen) 及彈性纖維(elastic fibers),影響DNA修復同免疫系統,並刺激黑色素產生,導致出斑、變黑、皺紋同血管增生等老化問題。

另外,UVA亦較UVB穩定,強度全年上落唔大,加上可以穿透到玻璃,所以佢絕對係皮膚老化嘅頭號敵人!!!! 為左維護皮膚健康,我地真係要由細到大做好正確嘅防曬措施。

 

以下係再深入少少嘅解釋,好學嘅朋友仔不妨睇睇:

(UVA令一啲皮膚底層叫Chromophore嘅分子進入激化狀態(excited state),而呢啲Excited Chromophore就會同皮膚細胞內其他分子進行化學作用,產生自由基及ROS,對皮膚進行破壞。)

 

小總結

UVA UVB有幾恐怖,相信大家都了解多左,記住一定要做好防曬!

但係市面上咁多防曬產品點樣揀?又化學性防曬(Chemical sunscreen)及物理性防曬(Physical/ Mineral sunscreen)好混亂?

而就算做足防曬,都冇可能100%阻隔紫外光,點樣用護膚品擊退自由基?點樣留住青春,唔好俾佢提早離你而去?

嚟緊我將遂一解答,以成分分析嘅角度,同大家分享下點揀防曬同抗衰老護膚品!

Related Posts

[Dr. Koala 成分小學堂] 果酸(AHA) - 四大換膚功效
果酸(AHA)是什麼? 果酸(α-羥基酸, Alpha-hydroxy acid, 縮寫AHA),作為羧酸的一種,不但是有機酸,更是一種能去角質達致換膚效果的成分。常用於護膚品的果酸有甘醇酸(Glycolic Acid)、乳酸(Lat...
Read More
爽身粉都致癌?──滑石粉出沒注意
  相信有留意開新聞嘅朋友都知道,早前美國一名婦人因長期(超過35年)使用強生(Johnson and Johnson)爽身粉去爽佢私處,去年死於卵巢癌,陪審團裁定強生須賠償7,200萬美元(5.6億港元)。呢單野引起全世界哄動(起碼...
Read More
容易出油就是油性肌膚嗎?
成日買護膚品都見到適合乾性/油性/中性/混合性皮膚嘅字眼,究竟我地應該買邊隻,唔同膚質又代表啲咩呢? 無論你係咩皮膚,我地嘅最終目標都係去到中性膚質,因為中性先係最理想嘅膚質,會產生最少皮膚問題。緊記!膚質問題唔一定會跟你一世,你係絕...
Read More

0 個留言

留言

最新文章